वडगाव निंबाळकर पोलिसांची धडक कारवाई; जबरदस्तीने वेश्या व्यवसायाकडे खेचल्या जाणाऱ्या दोन महिलांची सुटका, दोन सराईत आरोपी अटकेत

 

              पुरंदर रिपोर्टर live 

सोमेश्वरनगर : प्रतिनिधी

             वडगाव निंबाळकर पोलिसांनी सोमेश्वरनगर हद्दीत अवैध वेश्या व्यवसायाचा पर्दाफाश करून दोन महिलांची सुटका केली असून, या प्रकरणी दोन सराईत आरोपींना अटक करण्यात आली आहे.

दिनांक 15 सप्टेंबर 2025 रोजी करंजे पूल बसस्टॉप परिसरात पेट्रोलिंगदरम्यान पोलिसांना काळ्या काचा असलेली लाल रंगाची संशयित गाडी फिरत असल्याची माहिती मिळाली. तत्काळ नाकाबंदी करून गाडी ताब्यात घेण्यात आली. तपासाअंती गाडीत दोन पुरुष व दोन महिला आढळून आल्या. महिला पोलिसांच्या उपस्थितीत चौकशी केली असता, पीडित महिलांना पैशाचे आमिष दाखवून जबरदस्तीने पुणे येथून लोणंद येथे आणून वेश्या व्यवसाय करण्यास भाग पाडण्यात आल्याचे समोर आले.

या प्रकरणी सुयोग हिंदुराव खताळ (रा. कापडगाव, लोणंद, ता. फलटण, जि. सातारा) व प्रीतम आप्पासाहेब घुले (रा. कापडगाव, लोणंद, ता. फलटण, जि. सातारा) या दोघांना ताब्यात घेऊन त्यांच्याकडील स्विफ्ट गाडी (MH 11 MD 8055) जप्त करण्यात आली आहे.

पीडित महिलेच्या फिर्यादीवरून वडगाव निंबाळकर पोलीस स्टेशनमध्ये भारतीय न्याय संहिता कलम 140(3), 143(3), 144(2), 3(5) तसेच महिला व मुली अनैतिक व्यापार प्रतिबंध अधिनियम कलम 4 व 5 अंतर्गत गुन्हा दाखल करण्यात आला आहे. या प्रकरणातून आणखी मोठे रॅकेट समोर येण्याची शक्यता असल्याने तपास सुरू आहे.

या कारवाईस माननीय संदीपसिंह गिल्ल, पोलीस अधीक्षक पुणे ग्रामीण, माननीय गणेश बिरादार, अप्पर पोलीस अधीक्षक, बारामती विभाग, माननीय सुदर्शन राठोड, उपविभागीय पोलीस अधिकारी, बारामती यांच्या मार्गदर्शनाखाली पोलिस निरीक्षक विलास नाळे, सहाय्यक पोलिस निरीक्षक नागनाथ पाटील, उपनिरीक्षक राहुल साबळे, श्रेणी उपनिरीक्षक डी.एस. वारुळे, हवालदार अमोल भोसले, तसेच एस.पी. देशमाने, रमेश नागटिळक, कुंडलिक कडवळे, पोपट नाळे, निलेश जाधव व नागनाथ परगे यांनी ही कारवाई केली.